കോട്ടയം > ജില്ലയിലെ കോൺഗ്രസ് പ്രസിഡന്റ് ആരായിരിക്കണമെന്നത് സംബന്ധിച്ച് ഹൈക്കാമാൻഡിൽ അഭിപ്രായം പറയാൻ ഉമ്മൻചാണ്ടി മടിക്കുന്നതായി ഉറ്റ അനുയായികൾ. പരമ്പരാഗത എ വിഭാഗത്തിലെ രണ്ടാംനിരയിൽ നിന്നുള്ള നേതാക്കൾക്ക് കിട്ടേണ്ട അവസരത്തിനായി ഉമ്മൻചാണ്ടി ഉണരുന്നില്ലെന്നാണ് ഇക്കൂട്ടരുടെ പരാതി.
ഉമ്മൻചാണ്ടി മനസ്സുവച്ചാൽ ഡിസിസി വൈസ് പ്രസിഡന്റ് അഡ്വ. ഫിൽസൺ മാത്യുവിന് സ്ഥാനം ഉറപ്പിക്കാനാകുമെന്നാണ് സൂചന. സംഘടനാ ചുമതലയുള്ള ഡിസിസി ജനറൽ സെക്രട്ടറി യൂജിൻ തോമസും സാധ്യതാപട്ടികയിൽ മുന്നിൽതന്നെയുണ്ട്. ഹൈക്കമാൻഡിന്റെ ഭാഗമായ ജനറൽ സെക്രട്ടറി കെ സി വേണുഗോപാലും ഇദ്ദേഹത്തിന്റെ കാര്യത്തിൽ താൽപര്യമെടുക്കുന്നുണ്ട്.
കെപിസിസി പ്രസിഡന്റ് നാട്ടകം സുരേഷ് സ്ഥാനത്തേക്ക് എത്തുമെന്ന അഭ്യൂഹവും ശക്തമാണ്. ഇതിനെതിരെയുള്ള പ്രതിഷേധവും ശമിച്ചിട്ടില്ല. കെ സുധാകരന്റെയും തിരുവഞ്ചൂർ രാധാകൃഷ്ണന്റെയും നോമിനിയായിട്ടാണ് സുരേഷ് പട്ടികയിലെത്തിയത്. എ വിഭാഗക്കാരനാണെങ്കിലും സുരേഷിന് ഉമ്മൻചാണ്ടിയുടെ വേണ്ടത്ര പിന്തുണയില്ല.
കോട്ടയത്തെ പ്രസിഡന്റിന്റെ പേരു മാത്രം നിർദേശിക്കാനാണ് ഹൈക്കാമാൻഡും കെപിസിസി പ്രസിഡന്റും ഉമ്മൻചാണ്ടിയോട് നിർദേശിച്ചത്. പതിറ്റാണ്ടുകളായി 14 ജില്ലകളിൽ പകുതിയോ അതിലധികമൊ സ്ഥലങ്ങളിലെ പ്രസിഡന്റുമാരെ നിർദേശിച്ചിരുന്ന നേതാവിനോടുള്ള അവഹേളന സമീപനത്തിൽ ഉമ്മൻചാണ്ടി കടുത്ത അമർഷത്തിലാണ്. ഇതുകൊണ്ടാണ് കോട്ടയത്തെ പ്രസിഡന്റിന്റെ പേരുപോലും പറയാതെ അദ്ദേഹം പ്രതിഷേധിക്കുന്നത്. ഫലത്തിൽ ഇതിന്റെ ഇരകളായി മാറുന്നത് ഉറ്റ അനുയായികളും.
ആദ്യഘട്ടങ്ങളിൽ രമേശ് ചെന്നിത്തല ജോസഫ് വാഴയ്ക്കനായി രംഗത്തുവന്നിരുന്നു. എന്നാൽ അവസാന റൗണ്ടിൽ ഇതിനായി അദ്ദേഹവും ബലംപിടിക്കുന്നില്ല. ആലപ്പുഴയിലടക്കം താൻ നിർദേശിച്ച പേരുകൾ അവഗണിക്കപ്പെട്ടതിൽ ചെന്നിത്തലയും ഖിന്നനാണ്. ‘പട്ടിക വരട്ടെ ബാക്കി പിന്നെ’ എന്ന സമീപനത്തിലേക്ക് ഉമ്മൻ ചാണ്ടിയും ചെന്നിത്തലയും എത്തിയെന്നാണ് ഇരു കൂട്ടരുടെയും അനുയായികളെ കുഴപ്പിക്കുന്നത്.
.jpg)