വീട് അടിച്ചുതകർത്ത കോൺ​ഗ്രസ് അക്രമികളെ അറസ്റ്റ് ചെയ്യാത്തതിൽ പ്രതിഷേധം

നെയ്യാറ്റിൻകര > വഴിമുക്കിൽ മുൻ മുനിസിപ്പൽ വൈസ് ചെയർമാൻ അബ്ദുൾ റഷീദിന്റെ വീട് അടിച്ചുതകർത്ത കോൺ​ഗ്രസ് അക്രമികളെ പിടികൂടാത്തതിൽ പ്രതിഷേധം ശക്തം. പ്രതികളായ ഐഎൻടിയുസി തൊഴിലാളികളായ റിയാസ്, സബീർ, നവാസ് എന്നിവരുടെ പേരിൽ കേസെടുത്തെങ്കിലും ഇവർ പ്രദേശത്തെ കോൺ​ഗ്രസ് നേതാക്കളുടെ സംരക്ഷണത്തിലാണെന്ന് ആരോപണമുണ്ട്.

ആക്രമണം നടന്ന വഴിമുക്കിലെ വീട് തിങ്കളാഴ്ച വൈകിട്ട് സിപിഐ എം ജില്ലാ സെക്രട്ടറി ആനാവൂർ നാ​ഗപ്പൻ സന്ദർശിച്ചു. സംഭവത്തിൽ കുറ്റമറ്റ അന്വേഷണം വേണമെന്ന് പൊലീസിനോട് ആവശ്യപ്പെടുമെന്ന് അദ്ദേഹം പറഞ്ഞു. കെ ആൻസലൻ എംഎൽഎയും ഒപ്പമുണ്ടായിരുന്നു. ഞായറാഴ്ച വൈകിട്ടായിരുന്നു സംഭവം. അബ്ദുൾ റഷീദിന്റെ ദേശീയപാതയോരത്തെ വീടിന് മുന്നിൽ പകൽ വാഹനത്തിലിരുന്നു മദ്യപിക്കുന്നത് വിലക്കിയതാണ് അക്രമത്തിന് കാരണമായത്. വീടിന്റെ ​ഗേറ്റും, ജനൽ ചില്ലകളും, പൂച്ചട്ടികളും അക്രമി സംഘം മദ്യ ലഹരിയിൽ തച്ചുടച്ചു. അക്രമികളുടെ പരാക്രമത്തിന്റെ ദൃശ്യങ്ങൾ സാമൂഹ്യമാധ്യമങ്ങളിലും പ്രചരിച്ചിരുന്നു.