പാലക്കാട്> ജില്ലാ കോൺഗ്രസ് കമ്മിറ്റി പ്രസിഡന്റ് സ്ഥാനത്തിന് മൂന്നുപേരുടെ പട്ടിക കൈമാറിയതോടെ തർക്കം രൂക്ഷമായി. മുൻ ഡിസിസി പ്രസിഡന്റ് എ വി ഗോപിനാഥിനായി കെപിസിസി പ്രസിഡന്റ് കെ സുധാകരൻ ഉറച്ചുനിന്നെങ്കിലും അവസാനം കൈവിട്ടതായാണ് വിവരം. 16 വർഷമായി നേതൃത്വത്തോട് അകന്നുനിൽക്കുന്നയാളാണ് ഗോപിനാഥ്.
നിയമസഭാ തെരഞ്ഞെടുപ്പിൽ പാർടിക്കെതിരായ ഗോപിനാഥിന്റെ പരസ്യ നിലപാട് ജില്ലയിൽ കോൺഗ്രസിന്റെ തോൽവിക്ക് ഇടയാക്കിയെന്ന് തെരഞ്ഞെടുപ്പ് തോൽവി പഠിക്കാൻ നിയോഗിച്ച സമിതി വിലയിരുത്തിയിട്ടുമുണ്ട്. ഇതെല്ലാം ഗോപിനാഥിന് തിരിച്ചടിയായി. മാത്രമല്ല, മുൻ ഡിസിസി പ്രസിന്റുമാർ വീണ്ടും സ്ഥാനത്ത് വേണ്ട എന്ന നിബന്ധനയും പുതുതായി ചേർക്കുകയും ചെയ്തു.
എ വി ഗോപിനാഥിനു പുറമെ കെപിസിസി ജനറൽ സെക്രട്ടറി എ തങ്കപ്പൻ, മുൻ എംഎൽഎ വി ടി ബൽറാം എന്നിവരാണ് പട്ടികയിൽ. ഇതിൽ ബൽറാമിനെ അനുകൂലിക്കുന്നവർ കുറവാണ്. പാലക്കാട് കേന്ദ്രീകരിച്ച് പ്രവർത്തന പരിചയമില്ലാത്തതാണ് ബൽറാമിന് വിനയാകുന്നത്. എ തങ്കപ്പനെതിരെ എ, ഐ ഗ്രൂപ്പുകൾ നേരത്തേ എതിർപ്പ് അറിയിച്ചിരുന്നെങ്കിലും ഇപ്പോൾ അയഞ്ഞു. പ്രതിപക്ഷ നേതാവ് വി ഡി സതീശനും ഒടുവിൽ കെ സുധാകരനും തങ്കപ്പനുവേണ്ടി രംഗത്തുവന്നതും സാധ്യത വർധിപ്പിച്ചു.
കെ സി വേണുഗോപാൽ യൂത്ത് കോൺഗ്രസ് പ്രസിഡന്റായിരുന്നപ്പോൾ ജനറൽ സെക്രട്ടറിയായിരുന്നു എ തങ്കപ്പൻ. വേണുഗോപാലിന്റെ പിന്തുണയും തങ്കപ്പൻ ഉറപ്പിച്ചിട്ടുണ്ട്. സാമ്പത്തിക രംഗം മോശമായ സാഹചര്യത്തിൽ ഡിസിസിയെ നയിക്കുക ശ്രമകരമാണെന്നും പണപ്പിരിവ് പ്രധാനചുമതലയായി മാറുമെന്നതും നേതൃസ്ഥാനത്തേക്ക് വരുന്നവർക്ക് മുന്നിലെ വെല്ലുവിളിയാണ്.
എ വി ഗോപിനാഥിനെ ഒഴിവാക്കിയാൽ പാർടിയിൽ കലാപമുണ്ടാകുമെന്ന് ഒരു വിഭാഗം മുന്നറിയിപ്പ് നൽകി. കാൽനൂറ്റാണ്ടായി കോൺഗ്രസ് കുത്തകയായി പെരിങ്ങോട്ടുകുറുശി പഞ്ചായത്തിനെ മാറ്റിയെന്ന അവകാശവാദമാണ് എ വി ഗോപിനാഥ് പക്ഷം മുന്നോട്ടുവയ്ക്കുന്നത്. എന്നാൽ ഗോപിനാഥിനെ അംഗീകരിക്കില്ലെന്ന നിലപാടാണ് മുൻ ഡിസിസി പ്രസിഡന്റ് വി കെ ശ്രീകണ്ഠൻ എംപിയുടേത്. ഇക്കാര്യം പരസ്യമാക്കുകയും ചെയ്തു. തീരുമാനം വന്നശേഷം പ്രതികരിക്കാമന്ന എ വി ഗോപിനാഥിന്റെ നിലപാടും നേതൃത്വത്തിന് തലവേദനയാണ്.
.jpg)