ചിറക്‌ മുളച്ചില്ല... പക്ഷേ അമ്മയാണ്‌

കൂട്ടുകാരെ കാണാനാകാതെ, സന്തോഷവും സങ്കടങ്ങളും രഹസ്യങ്ങളും പങ്കിടാനാളില്ലാതെ വിമ്മിട്ടപ്പെടുന്ന കുഞ്ഞുങ്ങളുടെ നിശ്ശബ്ദ തേങ്ങലുകളാണ് വീട്ടകങ്ങളിൽ നിറയുന്നത്. കൂട്ടുകാർക്കൊപ്പം മധുരം നുണഞ്ഞും കളിച്ചുല്ലസിച്ചും സ്കൂളിലേക്ക് പോയവർക്ക് കൂട്ട് മൊബൈൽ ഫോണിന്റെ ഇത്തിരി വട്ടം മാത്രം. ഓൺ ലൈൻ ക്ലാസുകളും വീടുകളിലെ അസ്വസ്ഥഭരിതമായ അന്തരീക്ഷവുമെല്ലാം കുട്ടികളുടെ സാമൂഹ്യ വളർച്ചക്ക് വിലങ്ങാവുകയാണ്. കുട്ടികൾ ലഹരിക്കടിപ്പെടുന്നതും അനാശാസ്യങ്ങൾക്ക് ബലിയാടാകുന്നതുമെല്ലാം കോവിഡ് കാലത്തെ സാധാരണ കാഴ്ചകളായി. കോവിഡ് കാലം ഇരുളിലാക്കുന്ന കുഞ്ഞുലോകത്തിലൂടെ ഒരു യാത്ര. ‘‘പിടയുന്ന ബാല്യം ’’.

ഷെൽട്ടർ ഹോമിന്റെ ഇരുട്ടുമുറിയിൽ പിഞ്ചുകുഞ്ഞിനെ മാറോട് ചേർത്ത് ഒരു പതിനഞ്ചുകാരി. മെലിഞ്ഞ് കൊലുന്നനെയുള്ള കൈകൾകൊണ്ട് ഏറെ പ്രയാസപ്പെട്ടാണ് അവൾ കുഞ്ഞിനെ ചേർത്തുപിടിക്കുന്നത്. ശൈശവം വിട്ട് കൗമാരത്തിലേക്ക് കടന്നപ്പോൾ തന്നെ ആ പെൺകുട്ടി അമ്മയായി. ബാല്യത്തിന്റെ കുസൃതിയും പ്രത്യാശയും തളിരിടേണ്ട കണ്ണുകളിൽ സങ്കടക്കടൽ. കുഞ്ഞിന്റെ അച്ഛനും പ്രായപൂർത്തിയായിട്ടില്ല.

ഗർഭിണിയായപ്പോൾ പെൺകുട്ടിയെ കോഴിക്കോട് ഷെൽട്ടർ ഹോമിലേക്കയച്ചു. മെഡിക്കൽ കോളേജാശുപത്രിയിൽ പ്രസവവും കഴിഞ്ഞു. കുഞ്ഞിനെ അനാഥാലയത്തിലേൽപ്പിച്ച് പെൺകുട്ടിയെ വീട്ടുകാർ തിരികെ എത്തിച്ചു. എന്നാൽ കുഞ്ഞിനെ നഷ്ടപ്പെടുത്താൻ അവളിലെ മാതൃത്വം അനുവദിച്ചില്ല. കുഞ്ഞുമായി വന്നാൽ തിരികെ വീട്ടിൽ പ്രവേശിപ്പിക്കില്ലെന്ന വീട്ടുകാരുടെ വാശിക്ക് മുമ്പിൽ അവൾ കീഴടങ്ങിയില്ല.

കുഞ്ഞിനെ വീണ്ടെടുത്ത അവൾക്ക് അഭയമായത് സർക്കാർ ഷെൽട്ടർ ഹോം. മനുഷ്യജീവിതത്തിനുമേൽ കരിനിഴൽ പരത്തി താണ്ഡവമാടുന്ന മഹാമാരിക്കാലം കവർന്നെടുക്കുന്നത് കുട്ടികളുടെ ബാല്യവും കൂടിയാണ്. സ്കൂളിൽ പോകാതെ വീടിന്റെ നാല് ചുവരുകൾക്കുള്ളിൽ ഒതുങ്ങിപ്പോയ കുട്ടികൾ മാനസിക സംഘർഷങ്ങൾക്കടിപ്പെടുന്നതും തെറ്റായ വഴികളിലൂടെ നയിക്കപ്പെടുന്നതും കോവിഡ് കാലത്തിന്റെ മറ്റൊരു ബാക്കിപത്രം.

കോവിഡ് തുടങ്ങിയതിന് ശേഷം ജില്ലയിൽ ബാലവിവാഹം വർധിക്കുന്നതായി കണക്കുകൾ വ്യക്തമാക്കുന്നു. സ്കൂളിൽ പോകാതെ വീടുകളിൽ തന്നെ കഴിയേണ്ടിവരുന്ന കുട്ടികൾ ഒളിച്ചോടിപ്പോയി ഒരുമിച്ച് താമസിക്കുന്ന പ്രവണത വർധിക്കുന്നു. വിവാഹം എന്ന നിയമപരമായ ഉടമ്പടിയല്ല. ആദിവാസി വിഭാഗത്തിലാണ് ബാല വിവാഹം കൂടുതലെങ്കിലും മറ്റ് വിഭാഗങ്ങളിലും കേസുകൾ റിപ്പോർട്ട് ചെയ്യപ്പെടുന്നതായി ജില്ലാ ശിശു സംരക്ഷണ ഓഫീസർ ടി യു സ്മിത പറഞ്ഞു. 2019ൽ 25 കേസുകളും 2020ൽ 27 കേസുകളും 2021 ജൂൺ വരെ 29 ബാലവിവാഹങ്ങളും റിപ്പോർട്ട് ചെയ്തതായി അവർ പറഞ്ഞു.

കൂടുതൽ ആദിവാസികളിൽ

ജില്ലയിൽ ബാലവിവാഹം കൂടിയതായി ചൈൽഡ്ലൈനിൽ ലഭിക്കുന്ന റിപ്പോർട്ടുകൾ സൂചിപ്പിക്കുന്നു. കൂടുതലും ആദിവാസി വിഭാഗങ്ങൾക്കിടയിൽനിന്നാണ് ബാലവിവാഹങ്ങൾ റിപ്പോർട്ട് ചെയ്യുന്നത്. കൗമാരപ്രായക്കാർക്കിടയിൽ ആവശ്യമായ ബോധവൽക്കരണ പ്രവർത്തനങ്ങളുടെ അഭാവവും വിദ്യാലയങ്ങളിൽ നിന്നുള്ള കൊഴിഞ്ഞുപോക്കും ഇതിന് കാരണമാകുന്നുണ്ട്. കുടുംബജീവിതം മുന്നോട്ടുകൊണ്ടുപോകുന്നതിനുതകുന്ന വിദ്യാഭ്യാസ–--തൊഴിൽ പിന്തുണയും ശാരീരിക–- മാനസിക വളർച്ചയെത്തിയതിനുശേഷം മാത്രം വിവാഹിതരാവുന്നതാണ് ഉത്തമം. ഇക്കാര്യത്തിൽ ബന്ധപ്പെട്ട വകുപ്പുകളും ഏജൻസികളും സന്നദ്ധ സംഘടനകളും കൂടുതൽ കാര്യക്ഷമമായി ബോധവൽക്കരണ പ്രവർത്തനങ്ങൾ ഏറ്റെടുത്ത് നടത്തേണ്ടതുണ്ട്.

പി കെ ദിനേശൻ,

ഡയറക്ടർ ചൈൽഡ് ലൈൻ)

പ്രായത്തെക്കുറിച്ചുള്ള 
അവബോധമില്ലായ്മ

സ്വന്തം പ്രായത്തെക്കുറിച്ചുള്ള അവബോധമില്ലായ്മയും വിവാഹ ചടങ്ങുകൾക്ക് പ്രായം തെളിയിക്കുന്ന രേഖകൾ ആവശ്യമില്ലാത്തതുമാണ് ആദിവാസികളെ കസ്റ്റമറി മാര്യേജിലേക്ക് നയിക്കുന്നത്. ഒരുമിച്ച് താമസിക്കുന്നു എന്ന പ്രവണതയാണ് കൂടുതലും കണ്ടുവരുന്നത്. ഇവരെ കാര്യം പറഞ്ഞ് മനസ്സിലാക്കി വേർപിരിച്ച് താമസിപ്പിച്ച് വരുന്നുണ്ട്. ഓരോ കോളനികളുടെയും പരിധിയിൽ വരുന്ന അങ്കണവാടി വർക്കർമാർ, എസ് ടി പ്രൊമോട്ടർമാർ എന്നിവരുടെ നേതൃത്വത്തിൽ കോളനികൾ കേന്ദ്രീകരിച്ച് ബോധവത്കരണവും നടത്തിവരുന്നുണ്ട്.

ടി യു സ്മിത

ജില്ലാ ശിശുസംരക്ഷണ ഓഫീസർ

ആരോഗ്യത്തിന് ഭീഷണി

മാനസികവും ശാരീരികവുമായ വളർച്ചയെത്താത്ത പ്രായത്തിൽ വിവാഹം ചെയ്യുന്നതും ഗർഭിണിയാകുന്നതും കുട്ടികളുടെ മാനസിക, ആരോഗ്യനില തകരാറിലാക്കും. മാസം തികയാതെ പ്രസവിക്കുന്നതും കുഞ്ഞുങ്ങൾ മരിക്കുന്നതുമെല്ലാം ഇതിന്റെ പരിണതഫലമാണ്. അമ്മയുടെയും കുഞ്ഞിന്റെയും ആരോഗ്യനില തകരും. ആയുർദൈർഘ്യവും കുറയുന്നു. അമ്മയാകാനുള്ള പക്വത കൈവരിക്കാത്തതും ഇവരുടെ നിലനിൽപ്പിന് ഭീഷണിയാണ്.

ഡോ. ആർ രേണുക

(ഡിഎംഒ, വയനാട്)