വില കിട്ടാതെ ഇഞ്ചി; നെഞ്ചുരുകി കർഷകർ

റാന്നി> പച്ച ഇഞ്ചി എടുക്കാൻ ആളില്ലാത്തത് കാരണം ഉള്ളം പുകഞ്ഞ് കർഷകർ. കഴിഞ്ഞവർഷം കിലോയ്ക്ക് 100 രൂപ വരെ വില ഉണ്ടായിരുന്നത് ഇപ്പോൾ 50–60 രൂപയായി കുറഞ്ഞു. ഈ തുകക്കും ഇഞ്ചിയെടുക്കാൻ ആളില്ലാത്തതാണ് കർഷകരെ വലച്ചത്.

ലോക്ക് ഡൗണിൽ എല്ലാവരും വീട്ടിലായപ്പോൾ എല്ലാവരും സ്വന്തം ആവശ്യത്തിനുള്ള പച്ചക്കറികൾ വീട്ടിൽ തന്നെ ഉല്പാദിപ്പിക്കാൻ തുടങ്ങി. ഇത് ഇഞ്ചിയുടെ വിലയിടിയാൻ കാരണമായി. അത്യാവശ്യത്തിന് വീട്ടിൽതന്നെ ഇഞ്ചി ഉള്ളപ്പോൾ പിന്നെ ആരും കടകളിലേക്ക് പോയില്ല. റാന്നി, മുക്കൂട്ടുതറ ചന്തകളിൽ തമിഴ്നാട്ടിൽ നിന്ന് എത്തുന്ന സംഘമായിരുന്നു പച്ച ഇഞ്ചി വിലയ്ക്ക് എടുത്തിരുന്നത്. അവർ എത്താത്തതും ഇഞ്ചിയുടെ കച്ചവടം മുടങ്ങാൻ കാരണമായി.

2000–-3000 കിലോ ഇഞ്ചി വരെ ഓണത്തിന് വിളവെടുക്കാൻ കൃഷിചെയ്ത് കാത്തിരുന്ന കർഷകരാണ് ഇതോടെ വെട്ടിലായിരിക്കുന്നത്. ഇപ്പോൾ കച്ചവടത്തിന് പറക്കോട് ചന്തയാണ് ആശ്രയിക്കുന്നത്. ഇവിടെയും തമിഴ്നാട്ടിൽനിന്ന് കച്ചവടക്കാർ എത്താത്തതുമൂലം കച്ചവടം കുറവാണ്. ഉണക്കി ചുക്ക് ആക്കാൻ കാലാവസ്ഥ കാരണം കഴിയുന്നില്ല. ഒരു കിലോ ചുക്ക് ഉണ്ടാക്കാൻ അഞ്ച് കിലോ പച്ച ഇഞ്ചിയെങ്കിലും വേണം.

കിലോയ്ക്ക് പരമാവധി 1700 രൂപയാണ് ചുക്കിന് ലഭിക്കുന്നത്. പണിക്കൂലികൂടി കണക്കാക്കിയാൽ കിലോയ്ക്ക് 30 രൂപ പോലും കിട്ടാത്ത അവസ്ഥയാണ്. മലയോരമേഖലയിൽ കാട്ടുമൃഗങ്ങളുടെ ആക്രമണം രൂക്ഷമായതോടെ കർഷകർ വാഴയും കിഴങ്ങുവർഗങ്ങളും ഉപേക്ഷിച്ച് ഇഞ്ചി ഉൾപ്പെടെയുള്ളവ കൃഷിചെയ്തു വരികയായിരുന്നു.