ഭാര്യയും കൂട്ടുകാരും ആത്മഹത്യയിലേക്ക് തള്ളിവിട്ടെന്ന് കുറിപ്പ്; നവവരന്‍ ജീവനൊടുക്കി

രാജ്കോട്ട്: യുവാവ് ഹോട്ടൽമുറിയിൽ ജീവനൊടുക്കിയ സംഭവത്തിൽ ഭാര്യയുടെയും സുഹൃത്തുക്കളുടെയും പേരിൽ പോലീസ് കേസെടുത്തു. ഗുജറാത്ത് തരാദ് സ്വദേശി അമൃത് റാത്തോഡിന്റെ(25) മരണത്തിലാണ് പോലീസ് കേസെടുത്തത്. അമൃതിന്റെ സഹോദരനാണ് പരാതി നൽകിയത്.

കഴിഞ്ഞ ശനിയാഴ്ചയാണ് അമൃത് റാത്തോഡിനെ സ്വകാര്യ ഹോട്ടൽമുറിയിൽ ജീവനൊടുക്കിയനിലയിൽ കണ്ടെത്തിയത്. സീലിങ് ഫാനിൽ തൂങ്ങിയനിലയിലായിരുന്നു മൃതദേഹം. യുവാവിന്റെ ആത്മഹത്യാക്കുറിപ്പും ഇവിടെനിന്ന് കണ്ടെടുത്തിരുന്നു. ഭാര്യ പായലും അവരുടെ നാല് സുഹൃത്തുക്കളുമാണ് തന്നെ ആത്മഹത്യയിലേക്ക് തള്ളിവിട്ടതെന്നായിരുന്നു കുറിപ്പിലുണ്ടായിരുന്നത്.

മൂന്ന് മാസം മുമ്പാണ് അമൃതും പായലും വിവാഹിതരായത്. വിവാഹശേഷം പായൽ ഭർത്താവിനെ നിരന്തരം ഉപദ്രവിച്ചിരുന്നതായാണ് ആരോപണം. യുവതിയും സുഹൃത്തുക്കളും ചേർന്ന് അമൃതിനെ അപകീർത്തിപ്പെടുത്തിയെന്നും യുവാവിനെക്കുറിച്ച് അപവാദം പ്രചരിപ്പിച്ചെന്നും സഹോദരന്റെ പരാതിയിലുണ്ട്. ഇതുകാരണം യുവാവ് ഏറെ ദുഃഖത്തിലായിരുന്നുവെന്നും ഇതാണ് ആത്മഹത്യയിലേക്ക് നയിച്ചതെന്നും പരാതിയിൽ പറയുന്നു. 

അമൃതിന്റെ ഭാര്യ പായൽ, ഇവരുടെ സുഹൃത്തുക്കളായ വിഷ്ണു, പ്രവീൺ, അനിൽ, കിഷൻ എന്നിവർക്കെതിരേയാണ് സഹോദരൻ പരാതി നൽകിയത്. ഇവർക്കെതിരേ ആത്മഹത്യാപ്രേരണാക്കുറ്റം അടക്കം ചുമത്തിയാണ് പോലീസ് കേസെടുത്തിരിക്കുന്നത്.Content Highlights: man commits suicide in gujarat police booked case against his wife and her friends